Monday, 19 September 2016

Kya ho saka kisi se madawa sakoot ka

Kya ho saka kisi se madawa sakoot ka
Shehr-e-sada bana hai, kharaba sakoot ka

Nikla youn cheekhta huwa apnay daroon se mein
Atraaf mein bikhar gaya malba sakoot ka

Ab dair tak main bol sakon ga tere khilaf
Apna liya gaya hai jo lehja sakoot ka

Kya kya na dheyan mein rahi aawaz ki tarang
Jab khenchnay laga hon main naqsha sakoot ka

Gungay labon ne raaz wo afsha kiye k bas
Honay laga hai jab bhi khulasa sakoot ka

Ik baar hont cheer k nikla tha koi harf
Phir umr bhar wo sog manaya sakoot ka

Jab tak huwa nahi tha main Zeeshan lab kusha
Chaaya huwa yahan tha andhera sakoot ka

Poet; Zeeshan Illahi

0 comments:

Post a Comment