Haseen hai shaam yoon jeise koyi singhaar karta hai

Haseen hai shaam yoon jeise koyi singhaar karta hai
Dilon pe doobta sooraj kuch aese waar karta hai

Hain lab khamosh maathe par shikan aankhon mein afsane
Mujhe lagta hai Waa'iz bhi kisi se piyar karta hai

Ajab yeh dil ajabtar silsile is dil k deakhe hain
Tamasha jab bhi karta hai sar e baazar karta hai

Hamare rang se hi in nazaron mein hai rangeeni
Bahaar e nou ka sooraj bhi mera deedar karta hai

Koyi pooche agar mera faqat itna bata dena
Haseenon k nagar mein dil ka karobaar karta hai

Taqaza e Muhabbat mein ajab andaaz hain us ke
Idhar taazeem karta hai udhar takraar karta hai

Faqeeh e shehar ne yeh jurm sabit kar diya mujh par
Khuloos e dil se duniya mein har ik se pyar karta hai

Comments