Ghaao Gintay Na Kabhi Zakhm Shumaari Kartay

Ghaao Gintay Na Kabhi Zakhm Shumaari Kartay
Ishq Mein Hum Bhi Agar Waqt Guzaari Kartay

Tujh Mein To Khair Mohabbat K Thay Pehloo Hi Bahut
Dushman-e Jaan Bhi Agar Hota To Yaari Kartay

Ho Gaye Dhool Tery Rasty Mein Baithy Baithy
Ban Gaye Aks Teri Aayina Daari Kartay

Waqt Aaya Hai Judaai Ka To Ab Sochtay Hain
Tujhy Aasaab Pe Itna Bhi Na Taari Kartay

Hoty Sooraj To Hamain Shah-e Falak Hona Tha
Chaand Hoty To Sitaron Pe Sawaari Kartay

Kabhi Ik Pal Na Mila Takht-e Takhayyul Warna
Teri Har Soch Ko Hum Raaj Kumaari Kartay

Aakhri Daao Lagana Nahi Aaya Hum Ko
Zindagi Beet Gayi Khud Ko Jawaari Kartay

Comments