Meri zameen par jo chandni hai woh sab teri hai

Meri zameen par jo chandni hai woh sab teri hai
mere falak par jo dilkashi hai woh sab teri hai

jo titliyon ke paron pe likhe hain khat mere hain
yeh jugnuon mai jo roshni hai woh sab teri hai

jo shab pe chayi khamoshian hain woh sab meri hain
sehar mai jitni bhi naghmagi hai woh sab teri hai

jo tere manzar mai aur manzar hain sab mere hain
jo mere sene mai shairi hai woh sab teri hai

jo teri muthi mai khusbuen hain woh sab meri hain
jo meri aankhon mai roshni hai woh sab teri hai