Khud pay tohmat na laga pehlay say
Main hoon weraan saraa pehlay say
Khud se milnay ki TU karnay day sa'ee
Youn na deewar utha pehlay say
Teri aamad pe ye hangaama nahi
Mujh mein hai shor bapaa pehlay say
Hauslay jama'aa mujhe karnay day
Saamnay mere na aa pehlay say
Uss se kya soorat-e-yakjaayi ho ?
Wo to apna bhi na tha, pehlay say
Khaif-e-radd duaa mat hona
Meri shaamil hai nawaa pehlay say
Teri soorat ka ye mohtaaj nahi
Dil hai aaeeina mera, pehlay say
Ye sataaish tujhe zaiba hi nahi
Main hoon paaband-e-wafaa pehlay say
Kiyon daraata hai, Jahannam se mujhe ?
Mujh mein hai khauf-e-khudaa pehlay say
Ay maseehaa ! teri taqseer nahi
Dil tha bemaar mera, pehlay say
Dosh kiyon kar doon khizaaon ko Sahar !
Rang tha mera, urraa pehlay say
Comments
Post a Comment