Dil e ashuftgan se kheltay hain

Dil e ashuftgan se kheltay hain
Maken hain aur makan se kheltay hain

Bicha kar khud bisat-e-waqt ulti
Zamen wale zaman se kheltay hain

makan aur la'makan k darmyan ko
Hata kar darmyan se kheltay hain

Hamen kya fikr-e-farda, hum wahan hain
Jahan sab jism-o-jaan se kheltay hain

Bala ka hosla hai kar gason mein
Kahan k hain, kahan se kheltay hain

Chalo matti bhi ho jayen ge ik din
Abhi to asman se kheltay hain

Yahan herat kadon k darmyan hum
Haqiqat mein guman se kheltay hain

Hisab-e-zindagi rakhna hai kis ko
Chalo sod-o-zyan se kheltay hain

Kahani kar khud ko qissa-e-gham
Bana kar dastan se kheltay hain

Nahi hai umr jin ki khelnay ki
Wo chup chup kar jahan se kheltay hain

Hai jin ko zaum-e-goyaai wo Seema
Tere husn-e-bayan se kheltay hain