Friday, 18 March 2016

Jab Tak Gham-e-Jahaan K Hawaaley Huwe Nahi

Jab Tak Gham-e-Jahaan K Hawaaley Huwe Nahi
Hum Zindagi K Jaanney Waalay Huwe Nahi

Kehta Hai Aftaab Zaraa Daikhna K Hum
Doobay Thay Gehri Raat Mein Kaalay Huwe Nahi

Chaltey Ho Seena Taan K Dharti Pe Kis Liye
Tum Aasmaan To Sar Pe Sanbhaaley Huwe Nahi

Anmool Wo Gohar Hein Jahaan Ki Nigaah Mein
Dariya Ki Jo Tehon Se Nikaaley Huwe Nahi

Tay Ki Hai Hum Ne Soorat-e-Mehtaab Rah-e-Shabb
Tool-e-Safar Se Paao'n Mein Chhaaley Huwe Nahi

Dass Lein To In K Zehar ka Aasaan Hai Utaar
Ye Saanp Aasteen K Paaley Huwe Nahi

Teeshay Ka Kaam Raisha-e-Gul Se Liya Shakeeb
Hum Se Pahaarr Kaatney Waalay Huwe Nahi

0 comments:

Post a Comment