Saturday, 5 March 2016

Dukh dard main hamesha nikaalay tumhaare khatt

Dukh dard main hamesha nikaalay tumhaare khatt
Aur mil gaee khushi to uchhaalay tumhaare khatt

Mere lahoo mein goonj raha hai har eik lafz
Main ne ragon ke dasht mein paalay tumhaare khatt

Yun to hain beshumaar wafa ki nishaanyaan
Lekin har eik shay se niraalay tumhaare khatt

Jaise ho umr bhar ka asaasa ghareeb ka
Kuchh iss tarah se main ne sumbhaalay tumhaare khatt

EhEl e hunar ko mujh pe Wassi aitraaz hai
Main ne jo apne shair mein dhaalay tumhaare khatt

0 comments:

Post a Comment