Wednesday, 16 March 2016

Aa K Kar Le Tu Mera Deedar Din Do Chaar Mein

Aa K Kar Le Tu Mera Deedar Din Do Chaar Mein
Mar Na Jaaye Ye Tera Beemar Din Do Chaar Mein

Main Watan Mein Kuch Dinoon Ka Dosto Mehmaan Hoon
Bus Chala Jaaon Ga Sarhad Paar Din Do Chaar Mein

Umar Bhar Ki Hai Riyazat Fun Ki Tab Daulat Mili
Koi Ban Sakta Nahi Fankaar Din Do Char Mein

Dosti Ka Haath Thaamen Aap Hushyaari K Saath
Wo Munaafiq Hai Kare Ga Waar Din Do Char Mein

Ye Judaai Se Teri Socha Na Tha Ye Zindagi
Ess Qadar Ho Jaaye Gi Dushwaar Din Do Chaar Mein

Yek Ho Jaayen Musalmaan Phir To Aasaan Hai Bahut
Hum Gira Sakte Hain Ye Sarkaar Din Do Chaar Mein

Keh Rahi Hain Bahr e Furqat Ki Talaatum Kheziyaan
Laut Kar Aa Jaao Mere Yaar Din Do Chaar Mein

In Dinoon Charon Taraf Baad e Khizaan Ka Zor Hai
Mit Na Jaaye Raunaq e Gulzaar Din Do Char Mein

Rafta Rafta Youn Mukammal Ho Gayi Apni Ghazal
Hum Ne AshRaF Ye Kahe Ashaar Din Do Chaar Mein

0 comments:

Post a Comment